PULANG LOBO

Pulang Lobo

Ako na may pulang lobong tinangay sa kalangitan,

Kahit piliting habulin ay hindi na maaabot

Gaya ng guhit sa labing tuluyang kinalimutan.

Sa simula ay napuno ng halakhak at tawanan,

Nagdiwang sila't hindi na maawat hanggang nalimot

Ako na may pulang lobong tinangay sa kalangitan.

Ako ay pinagkaitan ng tangi kong kasiyahan—

Wala nang ibang hiningi, iyon lang ngunit hinablot

Gaya ng guhit sa labing tuluyang kinalimutan.

Mga mata'y kumulimlim hanggang dumating ang ulan,

Nagtampisaw sa sariling luha't tinuring na salot

Ako na may pulang lobong tinangay sa kalangitan.

Naiparinig ang kulog na dala'y katotohanan

Pagkatapos mabulag ng reynang kidlat na madamot

Gaya ng guhit sa labing tuluyang kinalimutan.

Madaya ang kapalaran, binurang kaligayahan

Sa mukha ng batang ito, akong sinakop ng lungkot—

Ako na may pulang lobong tinangay ng kalangitan

Gaya ng guhit sa labing tuluyang kinalimutan.

#FWLCOMEBACKACTIVITY6

Tulang Villanelle

Pulang Lobo | May 17, 2023 | Filipino Writer's League | Pagsulat ng Tulang Villanelle | 7th Place