DIMENSYON

Dimensyon

Naniniwala ka ba sa ikalawang dimensyon?

Sa ikatlo? 

Siguro, isang milyon?

O kulang pa ng isang libo?

Naniniwala ka?

Ako,

Pinipilit…

Yong sana ay mayroong ako

Na hindi ako.

Oo,

Medyo nakalilito

Pero gusto ko lang na makausap ang isang katulad ko.

Katulad ko na walang bahid ng ako.

Tanungin siya ng ilang katanungang bumabagabag sa akin,

Mga tanong na sinusubukan kong ipatangay sa hangin

Papalayo sa aking isipan

Na tingin ko’y dadalhin ko hanggang libingan.

Nasaktan ka na ba?

Nasugatan ang palad dahil 

Nakipag-agawan ng hinihiwang papaya?

O napunit ang balat

Dahil pinaglaruan ang basag na botelya?

Hanggang sa tumanda ka

At nalamang hindi pala iyon ang pinakamasakit.

Nasaktan ka na ba

Na ikaw lang ang may alam?

Saan ka nagkulang?

Sumobra?

O sakto ka lang?

Pwede bang kalimutan na lang?

Nakaramdam ka na ba ng pagsisisi?

Yong nagulat ka na lang isang araw

Lahat ng pangako ay nabali?

Sana di mo na lang siya sinulatan ng tula,

Tuloy di ka na ulit makabuo ng tugma.

Tama bang naniniwala ka sa malayong pag-ibig?

Ngayo’y ang mahal kita’y di na mabigkas ng bibig.

Sana iniwasan mo na nuon pa ang kape,

Di na mawaglit sa isipan ang pait ng dati.

Masyado ka sigurong naging sweet,

Nagkadayabetis ka tuloy… Awit.

Pwede bang pagaangin ang mga sana?

Naging masaya ka ba?

Kahit minsan?

Kahit panandalian?

Sa mundo mo ba’y marami kang kaibigan?

O mga taong hindi ka sinukuan?

Naaalala mo ba ang mga panahong iyong nilisan

Ang lungkot, lumbay, at kapighatian?

Ang pagtawa mo’y di mo mapigilan.

Ilang beses ka nang tunay na sumaya? Ilan?

Dalawa?

Tatlo?

Siguro, isang milyon?

O kulang pa ng isang libo?

Naniniwala ka?

Ako,

Pinipilit…

BIDYO

February 19, 2023 | Dimensyon | Tagubtob | Perpormer - Sarangani Writers League