Hinintay kita sa tuktok habang nakatingin sa malayo,
dama ang init ng paglubog ng araw at hangin sa pisngi ko.
Ako'y nakatayo sa gilid ng bangin at medyo kabado
dala-dala'y isang tanong, "sasaluhin mo kaya ako?"
Mga kasaguta'y bigla-biglang sa utak ko'y sumilip,
sinlakas ng hangin na rumaragasa at patuloy na umiihip.
Napagtanto na malabong magkatotoo itong panaginip,
pagkat puso mo'y hawak na at mayroon nang nakadakip.
Ngunit hinintay pa rin kita habang nakitingin sa malayo,
tanaw ang lalim ng bangin, sinlalim ng nadarama ko.
Di ko na kailangan pang tumalon pagkat namatay na ang puso ko,
puwera biro, matagal nang patay na patay sa 'yo.
No comments:
Post a Comment